ده كان حلم وﻻ بجد ؟؟

امبارح كان معادنا كمصريين مع اﻻستفتاء على التعديﻻت الدستورية وبغض النظر عن اللى قالوا نعم واللى قالوا ﻷ والنتيجة المبدئية اللى بترجح كفة نعم على مستوى معظم المحافظات اﻻ انى شخصيا كنت حاسس انى فى حلم جميل اوى ومش عاوز اصحى منه

امبارح كانت اقرب لجنة استفتاء فى نفس الشارع اللى ساكن فيه وعاوز اقولكم انه من الصبح بدرى والشارع اللى هادى بطبعه كان مليان ناس كتيييييييييييرة جدااا من مختلف اﻷعمار والطبقات داخلين خارجين على اللجنة لدرجة انه على وقت صﻻة الظهر قررت انى انزل انا وزوجتى علشان نصوت فى اﻻستفتاء لقينا طابور طويل جداااااااااا من جوة اللجنة لحد الشارع برة طوله تقريبا 600 متر أو أكتر وبالرغم من انى اتضايقت ﻷنى منزلتش بدرى لكن كنت فرحان جداااا وانا بشوف الناس وهى متحمسة انها تشارك وتقول رأيها ﻷول مرة بتحس فيه ان صوتها له قيمة وممكن يفرق كتير فى مستقبل بلد بحالها وأجيال كتيرة جاية ورانا

الشئ الوحيد اللى كان مستفز جدااااا هو شغل الأخوان المشبوهين ( المسلمين سابقا بعد ما قررت انى اسميهم كدة والسبب جاى دلوقتى ) كانوا عاملين حملة شرسة باسم الدين وعلماء اﻷمة اﻷجلاء وبيأثرو على الناس بطريقة بشعة انهم يقولو نعم ! وكأن هى دى الديموقراطية من وجهة نظرهم العقيمة ... اﻷخوان المشبوهين محدش يقدر ينكر انهم اكتر جبهة منظمة حاليا بس ده ميمنعش اننا نشك فى نواياهم خصوصا ان مواقفهم السابقة كلها مخجلة الحقيقة على المستوى الشعبى خاصة أيام اﻻحتجاجات والثورة وكدة لكن اللى شوفته امبارح أكدلى ان الناس دى غرضها مش كويس وليها مصلحة كبيرة ان التعديﻻت يتوافق عليها ويتم عمل انتخابات مجلس الشعب بدرى بدرى علشان يلحقو يلهفو نصيب كبير من التورتة اللى هى التأثير على مصير البلد والرئاسة ذات نفسها فى نفس الوقت اللى بيقولو فيه احنا مش هدفنا الرئاسة .. اسمع كﻻمك اصدقك اشوف امورك استعجب

انا مش فاهم ازاى ناس زى دى تتكلم باسم الدين ؟؟ ازاى يقولو اه علشان اﻻستقرار وعاوزين الناس كلها تقول اه بدعوى الاستقرار ؟؟ يعنى ايه استقرار من وجهة نظرهم ؟؟ يعنى فرعون جديد ؟؟؟؟؟؟ انا مش فاهم بصراحة هما عاوزين ايه بالظبط ... عيب اوى لما نكدب ونقول علماء اﻷمة بيقولو ان التعديﻻت تتوافق مع الشريعة الاسﻻمية والموافقة عليها واجب !!! حاجة تكسف

الحمد لله اول اختبار للديموقراطية نجح تقريبا .. الناس كانت متحمسة وحاسة انها ليها قيمة وصوتها هيفرق كتير

9 comments:

الميكروباص said...

الحقيقه انا كنت معترض على من قال "ان قولك نعم يبقى مع الشرع" على الرغم من قولي نعم، وبعض الممارسات على الطرف الآخر أيضا كنت معترض عليها، لكن التجربه في مجملها كانت اكثر من ممتازه ولأول مرة نعمل شيء بإرادتنا من سنين طويله

nody said...

لازم فى يوم زى ده
نعمل حاجتين
اول حاجه نترحم على شهداء الثوره
لانهم السبب بعد توفيق ربنا اننا نشوف يوم زى ده فى مصر
تانى حاجه ندعى على الاخوان المشبوهين والسلفين من قلبنا ربنا يخلصنا من اششكالهم الزباله عن قريب

Foxology said...

لورنس العرب

الاعتراض والاختلاف ده شئ صحى وطبيعى بدل كلمة موافقة اللى لزقت فينا من 30 سنة

التجربة كانت فعلا رائعة ويارب التجارب اللى جاية تكون على نفس الحدث

شكرا لمرورك وتعليقك

Foxology said...

nody

لهم الرحمة ولنا ايضا الرحمة والتمنى بأن اللى جاى يكون أفضل للجميع بدون استثناء

الناس دى الحقيقة واضح جدااا انهم بيجرو ورا مصلحتهم الشخصية مش مصلحة البلد

شكرا لمرورك وتعليقك

الازهرى said...

المشكلة إن الوضع هيستمر ومش هيتغير وهيفضل التوجيه موجود ما دا احنا مااتحركناش

لازم نتحرك علشان الوضع يتغير

Foxology said...

الازهرى

لازم نتحرك انا معاك بس المشكلة هنتحرك قد ايه لحد لما نفهم الملايين دى كلها اللى دماغها باظت وفسدت بفعل فاعل طول 30 سنة فاتت ؟

ربنا يسترها

شكرا لمرورك وتعليقك

AHMED SAMIR said...

الاستفتاء فعلا كان رائعا
بيبقى احساس فعلا جميل انك تحس انك بتشارك في القرار و ان رأيك مؤثر
اما الجماعات الدينية اياها فدة موضوع طويل يطول شرحه
هم عايزين يركبوا الموجة.....لكن دة بعدهم

Foxology said...

AHMED SAMIR

الاستفتاء كان حدث مهم وخطير وكانت مشاركات الناس ايجابية لحد كبير فعلا

الجماعات الدينية اياها المصيبة ان ليها قاعدة شعبية ضخمة جداااا وده شئ معروف على الأقل للناس اللى تعرف توجهات الناس دى ايه وازاى بينشروا افكارهم عن طريق القنوات الفضائية الدينية

شكرا لمرورك وتعليقك

شمس النهار said...

عارف سلاح الدين ده سلاح العاجز فكريا
مش قادر يؤثر في الناس بشكل عقلي منطقي
فااستغل تدين والتزام الشعب المصري بطبعه وعزف علي الوتر
الحرامي بيبقا طالع يسرق ويقول توكلت علي الله