معرض القاهرة الدولى للكتاب - 2


اكمل كلامى واقول ان المعرض السنة دى كان كويس مش وحش من ناحية التنظيم

اهم حاجة بأة حصلت السنة دى هى حفلتين توقيع حضرتهم مع زوجتى العزيزة ايــنـــو

الحفلة الأولى كانت لكتاب : حماتى ملاك تأليف الأستاذة سحر غريب صاحبة مدونة حماتى ملاك والحفلة كانت رائعة الحقيقة وكنا مبسوطين وفرحانين بالكتاب والأقبال كأنه الكتاب بتاعنا بالظبط

الف مبروك يا مدام سحر ويارب من نجاح لنجاح دايما


الحفلة التانية كانت لديوان شعر تأليف صاحبى اللذيذ : عادل سلامة .. الديوان اسمه : كليك شمال ... وده الديوان التالت لعادل بعد ديوان :شحتفة وديوان : الحب فى الجامعة اللى كان طفرة كدة فى الشعر العامى

الف مبروك يا أبو ليلى وعقبال الديوان المليون يا صاحبى

احب اقول حاجة اخيرة ... الناس اللى بتروح المعرض تلت ارباعهم على الأقل رايحين فسحة فقط لا غير محدش بيشترى حاجة ولا بيسمع حاجة والناس معذورة لأن يا اما الكتب غالية بشكل مبالغ فيه يا اما الناس معادش عندها دماغ اساسا للقراءة والثقافة


10 comments:

Empress appy said...

انا كنت هناك يوم حفل التوقيع بس انا محضرتش سلمت عليهم ومشيت قبل الحفله اصلا
وبعدين بجد المعرض مهزله الناس اللى رايحه فارشه فى الارض وجايبين اكل وحاجات غريبه مبيدوش فرصه للناس اللى عاوزين يشتروا اصلا لانهم رايحين يتفرجوا
انا اللى عجبنى اوى صاله 7 العرض اللبنانى
حلوة فاضيه ومنظمه وعرفت اشترى كتب
سور الازبكيه كويس بس مش منظم والعارضين رخمين بيعاكسوا واستظراف
باقى الصالات هكونا الاطه مش عارفه على ايه
بس انا قضيت ساعتين ونص فى المعرض مع نفسى حلوين من غير دوشه

Foxology said...

Appy

من ناحية المهزلة فحدث ولا حرج اللى جايب حلل محشى واللى جايب ترمس شاى ولا كأنه فى القناطر الخيرية !!

سور الأزبكية مروحتش بس اينو راحت ومعجبهاش من الزحمة

سراى 15 .. التمثيل الدولى ارقى صالة تقريبا بس عرض فقط

ربنا يسهل ويبقى منظم اكتر من كدة بس شكلك روحتى من يوم الجمعة لأنه قبل كدة كان نضيف ومكنش زحمة بشعة بالمنظر ده

شكرا لمرورك وتعليقك

شمس النهار said...

تصدق خلتني ندمت اني مارحتش
انا المفروض كنت رايحه
وتراجعت في اخر لحظه
لو كنت اعرف انكم كلكم هناك كنت رحت خلاص معلش اللقا نصيب

Eno said...

كان يوم لذيذ فعلا يافوكس

بس زعلت اني مش لحقت ازور فيه كل المعرض يلا الحمد للله

ربنا يبارك لسحر وعادل في كتابهم وينجح كده ان شاء الله:)

تحياتي :)

Foxology said...

شمس النهار

معلش تتعوض ان شاء الله واللقا نصيب :)

شكرا لمرورك وتعليقك

Foxology said...

Eno

كان لذيذ بس زحمة جدا
يارب يوفقهم ويكتب لهم النجاح

شكرا لمرورك وتعليقك :)

Kiara said...

عااااااااااااااا


ياريتني كنت جيت

Foxology said...

كيارا

معلش مفيش نصيب

شكرا لمرورك وتعليقك :)

محمود محمد حسن said...

من زمان ما رحتش معرض الكتاب ، من ييجي اربع سنين ولا حاجة ، بس متهيألي مش حيقدم جديد اوي بإستثناء حفلات التوقيع اللي بقت كتير اوي

Foxology said...

محمود محمد حسن

هو السنة دى انا حاسس انه فى تغيير بسيط فى نوعية الكتب والندوات الثقافية بس يمكن الوضع زى ماهو تقريبا

حفلات التوقيع كتيرة فعلا السنة دى وده مؤشر لزيادة الكتاب العاديين مش المشهورين

تحياتى ونورت الكيت كات :)