حاجات ع الماشى

اول حاجة : اثبتت التجربة الشخصية فى حالات فردية وحالات عامة ان اللى له ضهر ميضربش على بطنه واللى له واسطة وعين فى الادارة محدش يعرف يرفده




تانى حاجة : بكرة الساعة 1 الضهر فى كلية الفنون الجملية بالزمالك ندوة ثقافية للمبدع جلال امين .. الندوة مهمة بس المعاد رخم جدا




تالت حاجة : شيخ الأزهر اخيرا قال حاجة عدلة لما صرح ان ارتداء الحجاب فريضة على كل مسلمة وعلى المسلمات بالخارج اللى بيتمنعو من ارتداء الحجاب عليهم انهم يلجأو للقضاء ويحصلو على حكم بارتدائه .. خير اللهم اجعله خير .. ربنا يثبتك يا مولانا كمان وكمان



رابع حاجة : خبر جميل سمعته النهاردة وهو ان المطربة الجزائرية الأصل سعاد ماسى جاية مصر وهتعمل حفلة فى شهر مايو وسعاد ماسى فى الجزائر زى عندنا كدة منير بالظبط

سلام


20 comments:

Eno said...

عن اول حاجه يافوكس دي معروفه من زماااااااااااان اوي ومعني انك لسه مكتشفها دلوقتي بس ده في حد ذاته خير والله انه مش من زمان لاقدر الله :)

تاني حاجه
جميل اني الواحد يعزم علي انه يحضر ندوات تفيده لكن في حالتي انا جالي اكتئاب من كتر كل لما اقرر اني اخرج من السجن القي القرار اتلغي وانا مسجونه برضه
عاااااااااااادي

تالت حاجه
والله فرحت اني خد قرار اخير يرضي ربنا
ربنا يهدي

واخيرا
سعاد صوتها حساس وهادي جدا انا بحبه اوووووووي :)

تحياتي :)

Foxology said...

Eno

انا كنت عارف كدة بس مجربتش قبل كدة والتجربة ام الحقيقة زى ما بيقولو

السجن على الكل والله حتى اللى كل يوم بيخرج :)

اه اخيرا قال حاجة عدلة

نبقى نهرب ونروح سوا بأة ايه رأيك ؟ :))

شكرا لمرورك وتعليقك :)

عقل مهوي said...

مش هعرف اروح حفله سعاد ماسي
مش هعرف اروح حفله سعاد ماسي
مش هعرف اروح حفله سعاد ماسي
اصل ماليش ضهر يقويني اخد اجازه وانزل اشوفها
:(

شمس النهار said...

كلها اخبار لطيفه
بس الحقيقه شيخ الازهر كالعاده متأخر حبتين

Foxology said...

عقل مهوى

معلش ابقى اشترى واحد من حمام التلات :))

شكرا لمرورك وتعليقك :)

Foxology said...

شمس النهار

فعلا اخبار كويسة بس بالنسبة لشيخ الأزهر الحمد لله انه اتكلم واتكلم بحاجة كويسة مش زى عوايده

شكرا لمرورك وتعليقك :)

A.SAMIR said...

جلال امين دة عالم كبير فعلا...كتبه تعتبر وثائق للامة
اما مولانا فبما ان الموضوع دة بعيد عن الاسرة الحاكمة فهتلاقيه بيقول كلام زي الفل
اما المطربة الجزائرية فانا ماليش في الراي الحقيقة

كيــــــــــــارا said...

اول مره اسمع الشيخ بيقول حاجه عدله

خير اللهم اجعله خير هو اخر ايامه ولا ايه

صوت من مصر said...

دى اخبار السابعه والعشريين صح
تسلم يافوكس

Foxology said...

A.Samir

الدكتور جلال يعتبر مؤرخ الشعب فعلا كفاية كتاب ماذا حدث للمصريين كتاب تحفة

مولانا ممكن فعلا ؟ ياراجل ؟ مش عارف :))

سعاد ماسى تعتبر عملت تطوير فى الراى يعنى اغانيها فيها الحان راى بس مش طريقة الراى يعنى ميكس كدة بس جميل حاول تسمعلها حاجة :)

شكرا لمرورك وتعليقك

Foxology said...

كيارا

تقريبا كدة ربنا يحسن ختامه وختامنا

شكرا لمرورك وتعليقك :)

Foxology said...

صوت من مصر

بالظبط كدة :))

شكرا لمرورك وتعليقك :)

enjy said...

اللى ضهر طبعا ميضربش على بطنه دة كمان ممكن يضرب الناس التانية على قفاهم عادى جدا

شيخ الازهر انا رايي ان الموضوع لا
علاقة له بالثبات وانما هى سياسة صرفة

معرفش سعاد ماسى على فكرة

جلال امين عبقرى والمعاد رخم طبعا بس انا اصلا اسكندرانية

الله يسلمك

Foxology said...

enjy

فعلا ممكن يضرب الناس التانيين على قفاهم براحته بأة :))

سياسة فعلا بس اشمعنى دلوقتى ؟؟؟ كان فين من زمان ؟؟ هو ده اللى محيرنى الحقيقة :)

سعاد ماسى حاولى تسمعيلها لأنها شبه منير شوية :)

ياستى مرحب بأهل اسكندرية بنت اللذينة :)

شكرا لمرورك وتعليقك :)

نهر الحب said...

لقاء تدوينى يوم الجمعه 10/4
ببورسعيد اللقاء عبارة عن تجمع للتبرع للايتام المعاقين
ولقاء وتجمع تدوينى بعدها
ان شاء الله
ياريت تشرفنا
التفاصيل عندى وعند ماما امولة

Here i'm said...

بجد سعاد ماسى جاية مصر !!!

ممكن تبعتى مصدر الخبر لو سمحت ؟

Foxology said...

نهر الحب

ان شاء الله يكون يوم جميل واتمنى انى اكون معاكم

شكرا لمرورك وتعليقك :)

Foxology said...

Here I'm

ايوة سعاد ماسى جاية مصر فى حفلة SOS اللى هتتعمل ان شاء الله فى مركز شباب الجزيرة وللتفاصيل اكتر ده رابط الحفلة على الفيس بوك

http://www.facebook.com/home.php#/event.php?eid=72102562623&ref=mf

شكرا لمرورك وتعليقك :)

دعاء مواجهات said...

الف الف الف مبروك ع الجايزة بس دا ينفع يعنى تكون بتكتب قصص وجامدة وبتفوز ف مسابقات كمان ومتقولش ومتوريناش حتى حاجة منها..؟؟

انا ماليش دعوة بقى عاوزة اشوف حاجة منها ومش هتنازل عن طلبى دة

والف مبروك مرة تانية ..

Foxology said...

دعاء مواجهات


الله يبارك فيكى يا دعاء وان شاء الله هنزلهم فى بوست لوحدهم :)

شكرا لمرورك وتعليقك :)