بحب مصر البلد والناس

بحب مصر .. مصر البلد والارض والناس الطيبة .. الناس اللى وقفت فى الشوارع بالليل تحمى بيوتها واموالها واعراضها .. الناس اللى كان فيهم محمد ومينا وعم احمد والمقدس بطرس واقفين كلهم زنهار مستنيين اى حد يفكر ييجى ناحية شارعنا بس .. بحب الناس الحرة اللى بايتين ليل ونهار فى التحرير .. بحبهم اوى لانهم السبب الوحيد اللى يخلينا نقول بفخر .. انا مصرى .. الناس اللى رجعولنا كرامتنا جوة بلدنا قبل برة بلدنا .. الناس اللى بيتقال عليهم بياكلو كنتاكى وهما فى الحقيقة واقفين طوابير قدام كشرى التحرير ومطعم البرنس .. بحبك البلد دى اوى اكتر من اى وقت تانى وقد ايه كانت مظلومة معانا بس قدرنا نقولها اننا بنحبك وهندافع عنك بدمنا وده بجد مش كلام والدليل 305 مصرى مبخلوش بأرواحهم عشان انتى تعيشى

بحبك يا بلدى بالرغم من المتسلقين اللى عاوزين يسرقو فرحك .. بالرغم من الجهلة اللى بيقولو علينا عملاء وخونة .. بالرغم من اى حاجة حصلت وخسرتنا شغلنا وامور حياتنا .. مش مهم .. المهم اننا رجعنا لنفسنا بنفسنا كرامتنا ورفعنا راسنا تانى قدام العالم كله .. المهم انتى تعيشى

سيبك من الاعلام الحكومى المضلل المغيب لعقول شعبك الطيب اللى بيصدق كل حاجة بتتقال .. خليكى معانا واحنا والله مش هنسيبك الا لما نرجعلك كل حقوقك .. لحد لما ترضى عننا زى ما قال الكينج منير فى الاغنية دى اللى بالصدفة كان مسجلها من مدة طويلة قبل 25 يناير وكان نفسه تبقى لمصر وبقت فعلا لمصر


بحبك وهفضل احبك حتى لو قالو عننا بتوع اجندات وكشاكيل وكراريس كمان ولا عزاء للمتسلقين


2 comments:

شمس النهار said...

اجندة اجندة

بس برضوا هيمشي ومش هيقعد

اجندة اجندة

بس عندنا كرامة

خلاص ياابو يوسف ده كلام حلاوة روح
والنظام بيفرفر

Foxology said...

شمس النهار

ان شاء الله ماشى ودايما كنت بقولها .. هانت بس مكنتش متوقع ان الثورة هتبقى قريبة جدا كدة ونتائجها ضخمة بالشكل ده

النظام غير مرغوب فيه داخليا ولا خارجيا والحرامية هربو وسابو السفينة تغرق باللى فيها بس احنا مش هنسيبها تغرق خلاص عرفنا الطريق

شكرا لمرورك وتعليقك