هوجة 25 يناير

ناس هتزعل منى انى بقول عليها هوجة .. ونفس الناس هى هى مزعلتش واحنا بقالنا اكتر من 50 سنة بنقول على ثورة 52 ثورة وهى فى الاصل انقلاب عسكرى !! معلش عادى اهى شيزوفرينيا منغمسين فيها من أيام الفراعنة وملهاش علاج عند فرويد ذات نفسه

انا سميتها " هوجة " لسبب بسيط جداااااا ... اى ثورة فى الدنيا بيقوم بيها الشعب بيبقى ليها هدفين :

الهدف الأول : القضاء تماما ونهائيا على النظام الحاكم الحالى بكل أذرعه وأساليبه ومفرداته سواء مؤسسات او حتى افراد واستبدال النظام الفاسد ده بنظام جديد نظيف السيرة والسمعة من قلب الشعب اللى قام بالثورة .... أبسط مثال على الموضوع ده ومن قريب كمان علشان محدش يقولى ان التاريخ ﻻ يعيد نفسه : الثورة الجورجية اللى كانت من 7 سنين بالظبط وبالتحديد فى سنة 2003 واللى فيها تم القضاء نهائيا على النظام الحاكم وقتها وكل مفرداته ومؤسساته سواء بالخلع أو التطهير لدرجة تسريح 50 ألف فرد شرطة تقريبا فى يوم واحد فقط بما يعادل 60% من جهاز الشرطة بسبب فساد العدد الكبير ده

سؤال : هل حصل عندنا الكلام ده ؟؟؟ بمعنى اوضح .. حد بيسمع حاجة دلوقتى عن محاكمة مبارك ورموز النظام الفاسد السابق ؟؟؟؟ دى ابسط حاجة

الهدف الثانى : تكاتف الشعب (بكل طوائفه ) من جديد لإعادة بناء الدولة على أساس صالح يكفل للجميع الحرية والعدالة والكرامة وصون الحقوق بناء على ان الكل سواسية

سؤال : الكلام ده حصل عندنا لا مؤاخذة ؟؟؟ وادينا سلفيين واخوان نازلين تقطيع ف بعض ومخالفة للقوانين اللى بتنظم عملية انتخابات مجلس الشعب اللى اساسا هيبقى مسئول عن اصدار وتشريع القوانين .. يعنى بالعقل كدة بخالف القوانين علشان امسك منصب بيتيح لى تشريع القوانين ؟؟؟ ودى برضه ابسط حاجة برضه

يبقى عندى حق اسميها هوجة ؟؟؟ مع الاعتذار للى بيقولوا عليها ثورة ... تونس واللى عملته لحد دلوقتى يتقال عليه ثورة لكن احنا زى اللى رقصوا ع السلم بالظبط

5 comments:

لورنس العرب said...

لو تغاضيت عن الهدف الأول- دعنا نتحدث عن الهدف الثاني
وهو لن يحدث أبدا
وهو المشكله الأساسيه اللي احنا واقعين فيها
وهو المأساه التي سنراها مستقبلا لأن التيارات السياسيه سوف تسعى للشجار مع بعضهم البعض وليس لإستقرار البلد
الهدف الثاني الذي تحدثت عنه لو تحقق يبقى هاتقدر تعمل كل شيء وسوف تستقيم الامور عن قريب
لكن تحقيقه صعب في ظل الاطماع

لورنس العرب said...

مش مشكله ان اسمها هوجه
ثوره او هوجه او انتفاضه او أي شيء مش ده المهم
المهم ان يحصل شيء محترم
وإلى الآن لم يحدث أي شيء محترم والبلد في انحدار بسبب اولاد البلد

Foxology said...

لورنس العرب

كلامك سليم فى محله

ربنا يرحمنا م البلد وولادها اللى هيودوها ف داهية

شكرا لمرورك وتعليقك

شمس النهار said...

احنا فعلا رقصنا علي السلم
بس احنا رقصنا علي السلم يوم ماسجنا كل الروس دي في مكان واحد
واديناهم فرصة يمخمخوا لنا
والشعب المصري مش هيشوف خير
طول مافي مصري بياخد فلوس علشان يقتل اخوه المصري
او يولع في مصر

Foxology said...

شمس النهار

مع انى مش مقتنع بموضوع انهم بيمخمخوا لنا لأن الموضوع اعمق من كدة بكتير ... اعتقد والله اعلم ان فى حد دلوقتى فى السلطة ليه مصلحة فى اللى بيحصل

شكرا لمرورك وتعليقك