من هزيمة لأخرى .. يا مصر لا تحزنى

امبارح لعبنا مع منتخب الجزائر مباراة هامة جدا فى مشوار التصفيات المؤهلة لكأس العالم 2010 واللى هتتلعب فى جنوب افريقيا

منتخب مصر نازل بكل قوته بطل افريقيا مرتين ورا بعض باة محدش قده .. شحن معنوى كبير ولا كأننا هنحارب

وهوب .. 3 اهداف ورا بعض فى مرمى وحش افريقيا الكابتن عصام الحضرى احسن حارس مرمى ف افريقيا اللى كأنه اول مرة يشوف كورة امبارح

السبب الرئيسى فى الهزيمة مكنش رعونة ابوتريكة واستعراضه لمهاراته الشخصية بالرغم انها نفس المهارات اللى جابت الجون المصرى اليتيم .. ولا كان نرفزة وعصبية عمرو زكى ولا حتى اهتزاز مستوى الحضرى

دى هزيمة امة بحالها يا سادة عارفين ليه ؟؟

لو حد تابع التحليل الفنى اللى قبل المباراة على قناة النيل للرياضة اللى كان فيه الكابتن الكبير على أبوجريشة نجم الأسماعيلى ومصر السابق ومعاه النابغة العبقرى الفلتة الكابتن مجدى مقشة .. قصدى مجدى عبد الغنى اللى كان حاضر بصفته عضو مجلس ادارة اتحاد الكورة ف بلدنا واللى كان طول الوقت عمال ينفخ فى المنتخب وينفخ ف اللعيبة ووصل بيه السخف انه يقلل من قدرة المنتخب الجزائرى اللى كل اللعيبة فيه محترفين فى اقوى الأندية الأوروربية ماعدا حارس المرمى المحلى ومن قمة البلاهة انه قال بالحرف : فرصتنا كبيرة ف الفوز لأن منتخب الجزائر كله محترفين وكل لما يزيد عدد اللعيبة المحترفين فى الفريق ده معناه انه فريق غير متامسك وسهل هزيمته !!!! بالذمة ده كلام يدخل مخ عيل فى تالتة ابتدائى ؟؟؟

عرفتو سبب الهزيمة ايه ؟؟؟ اذا كان ده كلام عضو مجلس ادارة الأتحاد اللى بيدعم وبيرعى المنتخب يعنى ده كلام المسؤولين اللى دايما بيقولو كله تمام واحنا جامدين اوى بالصلاة ع النبى الخ الخ الخ يبقى طبيعى جدا اننها ننهزم ومن طوب الأرض وده على كل المستويات مش الكورة بس على فكرة واظن الأدلة كتيرة اوى

كفاية نفخة كدابة بأة واستخفاف بعقول الناس شكلكو بأة وحش اوى


25 comments:

الميكروباص said...

بس لأن انا محروق دمي من امبارح
بلاش تفكرني ارجوك

Foxology said...

لورنس العرب

كلنا دمنا محروق لكن العجيب ان القهوة اللى جمب البيت الناس كانت بتفرح بأهداف الجزائر !!!!!!!

معلش نعيش وناخد غيرها كتيييير

شكرا لمرورك وتعليقك يا هندزة :)

على باب الله said...

فعلاً الواحد كان واخد مقلب كبير في المنتخب و اللعيبة من الكلام الكبير بتاع الكابتن قشة و شركاه في الجريمة

كان عنده قناعة تامة أن أبوتريكة ده أجدع من رونالدو و أن عمرو زكي هو أحسن مهاجم في الدوري الإنجليزي

بصراحة إحنا منتخبنا تعبان .. الجزائر كانت تستحق تكسب بصراحة لأننا ما شطناش و لا كوره واحدة عدلة طول الماتش ... حتى الجون دخل بالعافية و بطلوع الروح مع أنه كان إنفراد تام بأتنين لاعيبة .. يعني كان المفروض يدخل بسهولة

ياللا بقى .. أملنا في كأس العالم 2014و عليك خير

يوميات شاب منوفى said...

المنتخب المصرى كان الافضل فى الشوط الاول بس فية لغز حصل فى الشوط التانى واعتقد بقى ان النفوس مش صافية وفية حاجة مش صح فى المنتخب انا كاتب بوست عن المنتخب شوفة تقبل مرورى

Foxology said...

على باب الله

على رأيك املنا فى 2014 ده لو لسه هتتلعب كورة ف بلدنا تانى

تحياتى :)

Foxology said...

يوميات شاب منوفى

هو فعلا كلنا عارفين ان فى حاجة غلط ايه هى الله اعلم

تحياتى وشكرا لمرورك وتعليقك

صيدلانيه طالعه نازله said...

اصلا ما بقاش لينا شكل عشان يبقى وحش

الوحش الافريقى كان عامل زى الاطفال

الصغيره و نازلين الماتش خايفين بيترعشوا

و غالبا كانوا لابسين بامبرز عشان الخضه

متبانش عليهم و تبقى فضيحه تانيه اكتر من الاولانيه

Foxology said...

صيدلانية طالعة نازلة

الحقيقة مش عارف ليه يعملو فينا كدة

زى ما يكون الكل متحالف علشان يجيلنا احباط ويأس من اى حاجة عدلة تحصل

يلا ما علينا

شكرا لمرورك وتعليقك

Kiara said...

والله معاك حق

الواحد نام زعلان امبارح

tarek momen said...

والله انا كنت متوقع اننا ننهزم
لاني كنت حاسس ان المسالة ماشية بالبركة و مافيش اعداد كويس او تجهيز لاعبين جدد لتطعيم الفريق الذي اصبح عجوز و بيلعب بالسمعة انه بطل افريقيا
في كل العالم بنشوف كل بطولة فرقة جديدة مطعمة باثنين ثلاثة من الخبرات القديمة ذوي المستوي العالي جدا
وفريقنا مطعم باثنين ثلاثة جدد والباقي انتهت صلاحيته
تحياتي

Foxology said...

كيارا

الواحد نام زعلان على البلد كلها مش المنتخب بس

شكرا لمرورك وتعليقك

Foxology said...

Tarek Mo'men

كلامك حضرتك صح يا استاذ طارق واتفق معاك تماما والدليل على كدة قوائم اللاعبين للمنتخبات اللى هتشارك فى كأس القارات اللى هتبدأ كمان اسبوع فرق كبير اوى بينا وبين الناس دى

فعلا الناس دى سبقونا بمليون سنة ضوئية

تحياتى وشكرا لمرورك الكريم :)

صوت من مصر said...

مش لاقى حاجه اقولها غير حسبى الله ونعم الوكيل

Unknown said...

ولا فاهمة حاجة

Foxology said...

صوت من مصر

ف ايه بالظبط الحسبنة يا محمد ؟؟ فينا ولا فيهم ؟؟؟؟

تحياتى وشكرا لمرورك وتعليقك :)

Foxology said...

enjy

كل الحكاية يا انجى ان هزيمة المنتخب امبارح نموذج لهزيمتنا فى حاجات تانية كتيرة وده بسبب الحاجات اللى قلتها اللى هى النفخة الكدابة وخداعنا لنفسنا قبل ما غيرنا يخدعنا

تحياتى وشكرا لمرورك وتعليقك :)

صوت من مصر said...

طبعا فى حسن شحاته وفريقه الوكسان

Foxology said...

صوت من مصر

ما المنتخب مننا واحنا منهم يعنى مصريين ف بعض برضه :))

شكرا لمرورك وتعليقك :)

3omda said...

يااااااااااااااه دانا عندي شويه كلام عن الكوره،و نفسي اطلعه،أولاً تعبير "مجموعة الموت" أي مجموعه بتقع فيها مصر لازم نقول عليها مجموعة الموت،حتي لو كانت مصر في مجموعه لوحداها.تأهيلاً بقي للي هايحصل بعد كده لو كسبا يبقي هاه المصريين اهما،ولو خسرنا يبقي هاردلك يارجاله عملتم اللي عليكم والماتش كان صعب.
ثانياً:ايه الاهميه الزائده عن الحد اللي احنا ادناها للكوره دي؟
ده لو الشعب كله اتفق علي موقف في حياته زي اتفافه علي ان ابو تريكه لازم ياعب اساسي،كان كل يوم قدرنا ناخد خطوه لامام.بس للاسف

Foxology said...

3omda

والله يا عمدة عندك حق ده حاجات تفقع يا راجل

يلا نتقابل فى 2014 ان شاء الله

تحياتى وشكرا لمرورك وتعليقك :)

محمود خاطر said...

أحترم وجهة نظرك
انت حقيقي جبت جديد
منظور جديد لاسباب الهزيمة
عشان احنا شعب جعجاع صحيح
ضجيج بلا طحين
عشان سايب الطحين علي الحكومة أما هو فكفاية عليه الضجيج والجعجعة

Foxology said...

محمود خاطر

بالظبط احنا بنتكلم كتير اوى وبنعمل كل حاجة بالكلام لكن محدش بيعمل حاجة ولو عمل بتبقى تخريب وافساد للأسف

تحياتى وشكرا لمرورك وتعليقك :)

The illusionist said...

هههههههههههههه
يا باشا الكلام ده ميدخلش عقل بتوع الروضه
دول محللين بتوع بول
مش محللين كوره قدم
دى ناس تعبانه والله
كل واحد فتحله برنامج
ويخش يقولك هنكسب
يعنى هيخش نقول هنخسر
يمشوه ويجيبوا اللاعب حسن زلمكه يقول اننا هنكسب
ولسه يا كبير
مستنيك فى البوست العالمى
بعد ماتش البرازيل
وماتش ايطاليا كمان
ونسينا نقول سلامو عليكم

Foxology said...

The Illusionist

ايوة طبعا مفيش محلل هيدخل البرنامج بتاعه يقولك هنخسر

البوست بتاع البرازيل هيبقى الحقيقة ربنا يسترها

شكرا لمرورك وتعليقك :)

محمود محمد حسن said...

فين تعليقك يا وحش على ماتش البرازيل وماتش إيطاليا ؟؟!!

والله اللي اتعمل في الماتشين دول صالحنا كتير