فـيلـم هـنـدى

احنا عندنا دش ... بكسر الباء وتشديدها ... والقنوات كتيييرة الحمد لله ربنا يزيد ويبارك ... قناة جديدة موجودة على القمر المصرى العظيم النايل سات اسمها (زى افلام) وزى افلام ياسادة يا كرام قناة مش مشفرة مجانية كل مهمتها فى الحياة انها تعرض الأفلام الهندى المترجمة الى اللغة العربية طوال الـ 24 ساعة يعنى صباح الغنا والرقص والألوان والضرب كمان وطبعا اوعو تنسو الحدوتة الهندية اميتاب تشان اللى بيتعرضله كل يوم خميس فيلم مخصوص ليه

القناة فكرتها حلوة اوى وهى ان الشرق الأوسط كان ولازال مولع بحاجة اسمها الفيلم الهندى لأنه من وجهة نظرى الشخصية المتواضعة فيلم كوكتيل هتلاقى فيها الكوميديا والأكشن والرومانسية والدراما وكله كله فى نفس الفيلم .. زمان كان الفيلم ممكن يوصل لأربع ساعات لو تفتكرو فيلم الشعلة والتوأمان والحاجات التحف دى اللى كانت تشتغل اول يوم العيد واول يوم العيد بس مش اى يوم فى السنة لكن دلوقتى احنا فى عصر السرعة يعنى لازم ينجزو ويقدمو كل حاجة فى نفس الفيلم بس فى وقت اقل فبقى الفيلم بالكتير ساعتين او ساعتين ونص وصعبان عليهم طبعا ازاى الفيلم يبقى اقل من اربع ساعات ؟؟

كل المقدمة دى علشان اقول حاجة واحدة بس ... مازالت الفلام الهندية كما هى نفس النمط لم تتغير منذ بدء السينما الهندية فى غزو الشرق الأوسط وخصوصا المنطقة العربية من الخليج الى النيل فقط والدليل على كدة النهاردة الصبح وانا بفطر طلعت ف دماغى اتفرج على القناة دى اسلى وقتى لحد ما انزل شغلى بحتة من فيلم هندى كله الوان زاهية وناس بتغنى ومبسوطة علشان احس ان الدنيا ربيع والجو بديع ولكن هيهاااااااات .. كان فيلم كالعادة كوكتيل كل الفكرة انه واحد مليونير متجوز واحدة جميلة جدا لكن افعالها خليته يشك فيها انها بتخونه لحد لما قتلها فى الآخر وفى المحكمة بدأت ابداعات السينما الهندية بأة اللى بتأكدلك انه فيلم هندى صرف .. المحامى بتاع الدفاع بيقول لالالا مقتلهاش بدليل ان مكالمة التليفون اللى البوليس بتاع النجدة سجلها لما القتيلة اتصلت تستنجد بيهم مجاش فيها كلمة ان جوزى هيقتلنى الحقونى وهوب ظهر واحد عجيب اشيب الرأس وقال .. جوزها هو اللى قتلها انا جوز امها الله يرحمها وانا اللى كانت بتكلمنى وتقابلنى من ورا جوزها وانا السبب ف انه يشك فيها ويقتلها ... ان ان آآآآآآآن... وطلع بأة ايه ؟؟؟ انه كان بـيـبـتـزها علشان ميروحش يقول لجوزها الراجل الغنى اللى من عيلة بأة وكدة ان امها الله يرحمها كانت سورى رقاصة !!!!! اه يا مرارتى ... وهوب قال كمان جوز ام القتيلة انا شوفته وهو بيقتلها ... وشوفته لما دفن جثتها الجبان الندل وقعد يعيط ... القاضى اتنحنح وقال نروح نعاين مسرح الجريمة هو الفيصل وهيقول اذا كان جوزها هو اللى قتلها ولا لأ ولما راحو مسرح الجريمة حفرو ولقو ايه ؟؟ ايون جثة القتيلة !!!! يا صلاة النبى ... هو فى قضية قتل من غير وجود جثة ؟؟؟؟؟؟ امال القضية شغالة على اساس ايه ان شاء الله ؟؟؟؟؟؟ اظن ان دى حاجة مش محتاجة انى اكون دارس قانون علشان اسالها لنفسى وابقى عارف انه مينفعش يكون فى قضية قتل شغالة فى المحكمة من غير وجود جثة وقاتل وعلى اساسهم بتشتغل القضية

مش بقولكم فيلم هندى ؟؟؟؟

14 comments:

Eno said...

فوكس هندي علي غيار الريق مع الفطار كده !!!

وكمان جريمة قتل عشان سوري مامتها رقصاه !!! :D

الموضوع جامد والله يافوكس خلي البلوجرز تنبسط
ههههههههههههههههههه

عارف في فيلم هندي انا بحبه اوووووي اسمه احلام تقريبا بس تحفه بتاع شروخان
ابقي دور عليه في القناه دي

Foxology said...

eno

اه يا اينو اتطسيت ف عقلى وقلت اتفرج وانا بفطر مكنتش اعرف انها هرتلة بالشكل ده لكن اهى طلعت بفايدة انى فقت بسرعة ومخى اشتغل الحمد لله وخرجت من تأثير الحباية الصفرا :))

شاروخان ؟ هبقى اشوف الفيلم ده اكيد هييجى هما وراهم غيرنا ؟ :))

منورة الكيت كات اكيد :)

دعاء مواجهات said...

يعنى هقولوا (فوكس ) بيسلم عليك يارسول الله؟؟؟؟؟

معرفش اسمك؟؟؟؟

أشوفك ع خيير

محمد الكومي said...

افلام هندي ايه يا شيخ حسني

تلاقيك زعلان و مفقوع اكمنها متكررة و محفوظة و لو حبيت تسرح بالشيخ عبيد في السيما و عرف انه فيلم هندي مش هيصدقك و هيهرشك

بطل بقى حوارات يا راجل

الا قوللي

انت عندك زي ماتسمعش عن بي فور يو

دي بقى اللي هتفقع مرارتك بجد

سلااااااااااااااااامو عليكو

tarek momen said...

يا نهار ابيض
لما انت حكيت الفيلم كله امال رحت شغلك الساعة كام
و لا الفيلم شدك لدرجة انك نسيت الشغل
علي فكرة كنت قرات مقال زمان ان هناك نوعان من السينما الهندية احدهما زي اللي انت شفته ودي السينما الشعبية الترسو يعني زي افلام فريد شوقي زمان وهناك سينما اخري للافلام رفيعة المستوي والتي تفوز بجوائز في كان في بعض الأحيان
تحياتي

Foxology said...

دعاء مواجهات

هههههههههههههههههههههههه

عندك حق

اسمى : احمد فتحى والسلام امانة بالله عليكى

ربنا يتقبل منك

تحياتى :)

Foxology said...

محمد الكومى

اعمل ايه بس يا معلم هرم حكمت معايا الظروف والواد مصاريف كترت والحاجة عاوزة حكما وادوية :))

نورتنى بجد :)

Foxology said...

Tarek Momen

والله يا استاذ طارق دول بالظبط كانو نص ساعة بس تخيل بأة بقيت الفيلم عامل ازاى :))

شكرا على المعلومة بس معرفش الفيلم ده ايه ظروفه بصراحة

نورتنى :)

Reem said...

بصراحة اللي شدني و خلاني اعلق على البوست هو انهاشك الغريب اللي مش لاقية له تفسير لانك مندهش من القصة و انت بتتفرج فيلم عندي
يعني الموضوع عادي وطبيعي
بس انا زعلانة انه القناة دي مش بتيجي عندنا اصلي بحب الافلام الهندية
بس بوست لذيذ اوي و مدونة حلوة

Foxology said...

reem

انا مندهش من كمية الأستهبال اللى كانت فى مدة نص ساعة بس من الفيلم اللى اتفرجت عليهم امال باقى الفيلم عامل ازاى ؟؟؟ دول غلبو افلامنا العربى :))

شكرا للمرور والتعليق ونورتى الكيت كات فى اول زيارة :)

واحدة مفروسة said...

يا عم فوكس انت سايب القنوات اللي فيها افلام كاها و رايح تتفرج على الفيلم الهندي اليومين دول فى القرن ال21

زمان انا فاكرة كنت بحب الافلام الهندية علشان الاغاني...اما قصص الافلام بتاعتهم لازم و لابد و حتماًً تاخد 3 اجيال...مش عارفه إيه الفكرة منها يعني

دلوقتي بيحاولوا يغيرو بس برضه طويله جداااا
و مع الايقاع السريع و من منطلق ان الواحد بيزهق بسرعة
فمش بقيت اتفرج على الهندي
لكن بشربة فى رمضان تمر
سلام

Foxology said...

واحدة مفروسة

اعمل ايه ؟ الظروف حكمت بكدة واهو الواحد مبيتعلمش ومن ساعتها مبجيش ناحية القناة المهرتلة دى :))

اشرب تمر ولله الأمر :))

نورتي الكيت كات :)

هبة النيـــــل said...

هههههههههههههههههههههه

دا هندي رسمي

فكرتني والله وانا بعمل رسالة الماجستير الدكتور اداني رسالة علشان أقرأها وأشوف الأفكار اللي فيها كانت بالنجليزي طبعا بس الجلدة مرسوم عليها فيل أي والله فيل وبعدين بمنتهى السذاجة بسأل الدكتور هو جنسية اللي كاتب الرسالة ايه طبعا استغرب وقاللي عيب عليكي الفيل دا كله ومش عارفة جنسية اللي كاتب الرسالة هندي طبعا هههههههههه

Foxology said...

هبة النيل

هههههههههههههههههه
حد برضه يحط على الكتاب فيل ؟؟ نعمل ايه مهو هندى صحيح :))

شكرا للمرور والتعليق