طـارق الــبــوّ و عم سـعـيـد المـصــرى

انا ربنا رزقنى بمواقف قمة فى الهرتلة كل لما اركب مواصلات مش عارف ليه ... الناس اللى متابعة البلوج ده تعرف حكايتى مع ميكروباص الأشتغالات كنت عملتها بوست قبل كدة فى البلوج هنا قبل ما الغيه وارجعه تانى ... حاجة زى كدة حصلت معايا يوم
الخميس اللى هو اول امبارح بليل متأخر والحكاية كالتالى
يوم الخميس كنت مع جماعة صحابى فى التحرير وانا مروح بأة حاولت اركب ميكروباص لبيتنا من ميدان عبد المنعم رياض لكن الدنيا كانت زحمة جدا ومكنش فى مكروباصات من اللى انا عاوزها فاضطريت انى اركب ميكروباص تانى يوصلنى قريب من بيتنا وبعد كدة انزل منه اركب تاكسى لحد بيتنا
ركبت ميكروباص خط امبابة وركبت جمب شاب ماشاء الله لا قوة الا بالله عضلات ومجانص ولبس نضيف لكن اول ما فتح بقه كأن جبل يتحدث طريقته فى الكلام تحس انه هياكلك او يلطشك قلمين لو قلتله مساء الخير المهم كان الشاب ده قاعد قدامه اتنين زمايله برضه وبنفس الهيئة اللبس الشيك والصوت الجهورى المفزع عاااادى مش مشكلة ، انطلق بينا الميكروباص وكان التلاتة بيتكلمو عن واحد صاحبهم بطل يشرب مخدرات وانهم مستغربين منه اوى قلت عادى وهوب الشاب المفتول العضلات اللى جمبى قال لواحد من الأتنين صحابه اللى قاعدين قدامنا ... ايه يا جدعان هو النهاردة مش هنشرب خابور ولا حاجة ؟؟؟ طبعا كان يقصد سيجارة بانجو أو حشيش واحد من صحابه قاله ايه يا عم عينى عينك كدة قدام الناس ؟ قاله بالصوت الجهورى اياه وايه يعنى يا عم هو حد له عندنا حاجة ؟؟؟؟ انا سمعت الكلمة دى وبرج من دماغى طار كنت همسك فيه واهزقه بالذوق لكن الناس دى مينفعش معاها الذوق ... سكتو لمدة ثوانى بعدها نفس الشاب قال فجأة ... انا مش عارف ليه ربنا مزنقها كدة عليا ... مفيش شغل ومفيش فلوس !!! ساعتها كنت هرد عليه اقوله ربنا بيفتحها على اللى عنده دم وبيخاف منه بس قلت يا واد طنش خااااالص سيبه هو ودماغه وبعدها الموبايل بتاع الشاب ده رن راح ماسكه وفاتح الشباك وبص للسما وقال ... يارب يكون شغل والنبى يارب بحق جاه النبى شغل والنبى يارب !!!! ورد على الموبايل .. ايوة مين ؟ ايوة يا طارق يا بــوّ ايه ؟ اه انا رايح له دلوقتى هجيبه بكرة الصبح واجيلك نقف معاك ع الفرشة !!! وبعدعا قفل معاه ووجه الكلام للأتنين اللى قدامه ان طارق باشا البـوّ احد اباطرة فرش الهدوم الجديدة فى منطقة وسط البلد عاوز اتنين يقفو على الفرشة بكرة علشان مفيش حد شغال معاه ... وبعد كدة طلع الكلام عن ان منطقة وسط البلد والشباب اللى بيفرشو على الرصيف بالتى شيرتات والبنطلونات ومعرفش ايه كلهم صحاب بعض وتقريبا امبراطورية واحدة ماسكها واحد اسمه شعبان النمرسى اللى بدا زيهم بفرشة قدام قهوة ريش فى طلعت حرب ودلوقتى بأة عنده مصنع فى اكتوبر بيضرب البنطلونات والهدوم الأصلية وينزلها تانى وسط البلد للعيال اللى بيفرشو
اللى طلعت بيه من الميكروباص ده ان الشعب المصرى عنده حالة ازدواجية متقدمة بيتكلم عن الحشيش والمخدرات وبعدها بثوانى بيدعى ربنا انه يرزقه بشغل !!! واللى طلعت بيه برضه ان الناس اللى بتفرش ع الرصيف فى منطقة وسط البلد بهدوم كلها هدوم مضروبة من مصانع شعبان النمرسى بمدينة 6 اكتوبر والسيد شعبان هو المسؤل عن الناس دى وعن شغلها وانه ماسك السوق ده من حديد
نزلت من الميكروباص شاورت لتاكسى عاوز اروح انام بأة كفاية كدة ربنا كرمنى واول تاكسى وقف قاللى اوكى واول ما ركبت وطلع بينا قاللى معلش يابنى رجاء خاص انا المشوار ده هاخد 5 جنيه علشان العربية شغالة بنزين مش سولار قلتله ليه يعنى ؟؟ المشوار ده كبيره اوى 4 جنيه قاللى معلش ده رجاء خاص قلتله ما علينا مع ان البنزين مغليش من اخر مرة وانا عارف التكسيات يا شغالة غاز طبيعى يا بنزين السولار دى اول مرة اعرفها قاللى انت عارف بأة العيشة ومش العيشة ولقيته لسه هيرغى وانا مفياش دماغ قلتله العيشة غالية على الكل يا اسطى قام ساكت، فجأة قاللى هو حضرتك شغال ايه ؟ قلتله ليه ؟؟ قاللى لا ابدا ادينا بنتكلم قلتله شغال مهندس حاسبات فى الجامعة الفلانية قاللى والله كويس الكومبيوتر هو دلوقتى اللى واكل السوق بالك انت لو خدتللك محل تحت البيت ولا قريب منك واخر النهار لما ترجع من الشغل تقعد فيه تصلح اجهزة وبتاع هتعدى وهتعرف تكون نفسك وتتجوز ومش بعيد تبقى جامد اوى والشركات تطلبك كمان قلتله انا مش بشتغل مهندس صيانة وماليش فى الحدوتة بتاعة المحلات دى مينفعش بعد ما طلعت عينى 5 سنين فى كلية الهندسة اقعد فى الآخر ف محل وابقى بياع قام قاللى مشى حالك ومعرفش ايه ولو عاوز تتجوز اجوزك كمان قلتله لالا شكرا انا خاطب والحمد لله كويس الحال مش وحش قاللى ربنا يكرمك وانا حمدت ربنا اننا وصلنا قام قاللى انا سعيد المصرى افتكرنى كويس وسلم على الدكتور اسماعيل شبايك انا بصتله باستغراب قاللى مش ده نائب رئيس الجامعة اللى انت شغال فيها ؟ قلتله اه ... قاللى لو شفته سلم عليه انا اعرفه معرفة شخصية وتصبح على خير
اه يا دماغى انا مش فاهم حاجة ... بجد نزلت من التاكسى وانا متلخبط هو الناس كدة طبيعية ولا انا اللى غلط علشان مستغربهم ؟؟؟؟
البوست القادم هتكلم عن الفلتة الفنية والطفرة العبقرية الشاب تامر حسنى اللى قرفنا بألبون جديد من افتكاساته مع انى مش بحبه ولا البلوج هنا يستحمل التفاهات دى بس احب اوصل صوتى ورأيى فى العك اللى بيعمله الأخ للناس كلها مبحبش اسكت

14 comments:

كاتب مصري said...

تحيتي
ياريت تشرفني بزيارة كريمة لمدونتي
أسعد بذلك كثيرا سأنتظر لمساتك على المدونة تحيتي
مدونتي هنا
http://kanyatklam.blogspot.com/

Foxology said...

كاتب مصرى

شكرا للمرور والتعليق :)

Eno said...

فوكس ايه كمية الهرتله دي

هههههههههههههههههههه
يالهوووووووووي الله يكون في عونك وربنا

الا الشاب مفتول العضلات ده والله العظيم عجايب

وسواق التاكس اللي كان عاوز يشتغل خاطبه بعد الضهر وطلع في الاخر يعرف شخصيات مهمه

ههههههههههههههههههههههههههه
كنت اعرف العروسه مين يافوكس مش جايز تكون قريبه الدكتور اسماعيل

الله يعينك ويقويك انا لو منك هشتري طياره بكره الصبح واروح بيها الشغل احسن من الزحام والقرف مش بزمتك فكره ؟؟
تحياتي ليك ربنا يصبرك :))

Foxology said...

eno

ههههههههههههههههههههههههههه

شوفتى الهرتلة اللى عايش فيها خطيبك ؟؟ :))

اعرف العروسة مين ؟؟ علشان ان شاء الله تروحى فيا السجن مش كدة ؟؟؟ :))

لا ياستى انتى خطيبتى والحمد لله على كدة :))

بفكر فى موضوع الطيارة ده لما بس يزودولنا الـ 30% هبقى اشوف الموضوع ده :))

نورتى الكيت كات :)

واحدة مفروسة said...

ههههههههههههه
إيه ده كله
عارف الحل ايه انك ما تسهرشي بالليل
اهو كل الهبل ده بيطلع على متاخر
كن سواقين ميكروباس لسواقين تاكس لركاب
تحياتي

tarek momen said...

العزيز فوكس الحكيم
انا بانظر للموضوع من ناحية تانية لأني نادرا ما اركب مواصلات بحكم معيشتي خارج القاهرة لكن في المرات التي انزل لقضاء بعض المصالح استمتع جدا بركوب المواصلات حيث تري مختلف النماذج الغريبة من البشر وتعيش معهم قصص حياتهم واحيانا مشاكلهم لمدة ساعة او ساعتين حسب زمن الرحلة وهكذا يكتسب الأنسان خبرة حياتية ثمينة
تحياتي

Foxology said...

واحدة مفروسة

مهو الحل انى مسهرش بس المشكلة انى نومى قليل وبسهر غصب عنى والله بسبب مشوار او حاجة وفعلا الهرتلة دى مش بتظهر غير بليل :))

نورتى الكيت كات :)

Foxology said...

Tarek Momen

اكيد طبعا الواحد بيكتسب خبرات من المواصلات مفيش شك بس ساعات بتبقى خبرات كلها اذى الحقيقة

نورتنى :)

enjy said...

والله عندك حق الاخ بتاع المكروباص دة فى منه كتييييييييييييييييير لدرجة انك تحس انك الوحيد اللى مش من هنا... سواقين التاكسيات رخمين بس بيصعبوا علية جدا بصراحة......... اما بقى البون الفنان اسمه ايه دة ياعم والله مستنية المقال بفارغ الصبر عشان اعرف الشريط فى ايه عشان طبعا مستحيل اقعد اسمعه كله حاكم انا سمعت حتة كدة بيقول فيها هو دة هى دى فمرارتى ما استحملتش خالص

محمد صبحى said...

حمدا لله على سلامتك
:)

وعلشان تروّق وتظبط كده بعد المغامرات الليلية دى
:)
خد اسمع دى

http://www.4shared.com/file/53249625/ab633472/I_LOVE_U___Omar_Faruk_Tekbilek.html?dirPwdVerified=d5d668e7

ياريت تعجبك

Foxology said...

enjy

يعنى مش انا وحدى اللى بحس انى مش من هنا ؟ :))

استنى المقال هتشوفى العجب

شكرا للمرور والتعليق :)

لورنس العرب said...

يا أخي غريبه
بيقول مفيش شغل ومفيش فلوس - طيب بيصرف على الخابور منين يخرب عقله
يالهوي
كل ده
يا عم انا ساعات بيحصل لي كده وانا راجع من الشغل دماغي بتخرب
عارف
احسن حاجه انك ماتفتحش كلام مع العالم خالص
متفهمش عندهم استعداد للدخول في حوارات وكلام كتييييييييييييييير والساعه بتكون 4 أو 5 والنيا حر اصلا والواحد مش طايق روحه
بس حلو اوي بتاع التاكسي اللي هايجوزك كمان
الراجل ده ايه يا عم
فووووووول أوبشن
بجد ناس تحرق الدم

Foxology said...

محمد صبحى

الله يسلمك يا صاحبى :)

ايوة كدة ويا محمد يا فنان اعدلنا دماغنا كمان وكمان :))

نورت يا محمد :)

Foxology said...

لورنس العرب

شوفت يا باشمهندس ؟؟ ادى العقليات اللى الواحد مضطر انه يتعامل معاها اناء الليل واطراف النهار حاجة تفقع بجد وتخرب العقل على رأيك

بتاع التاكسى ده اللى حدوتة لوحده والله :)

نورت الكيت كات :)