الشاب تامر والبونه الجديد



كما قلت سابقا ان البوست دى للحديث الغير هام عن فلتة هذا العصر والزمان الشاب الحبسجى تامر حسنى ملك الجيل الواقع الجيل التافه الجيل اللى بنطلوناته واقعة لحد ركبه وجيباته الجينز لحد تحت الركبة من تحت ومن فوق الأيشارب والتحجيبة التمام ولا اجدعها داعية اسلامية فى مجلس نساء محترم


اعذرونى مرارتى اتفقعت من الجيل التافه وملكه الأتفه ومن الدعاية الفارغة الكذابة اللى كل همها انها تلهى الناس وتغرقهم اكتر واكتر فى بحور التفاهة والهبل بعيد عن اى حاجة مهمة فى الحياة


الشاب تامر اتحفنا بألبون جديد نازل السوق بتقله مع الفيلم العبقرى اللى اكيد هياخد جائزة اوسكار السنة الجاية الكابتن هيما اللى الفه العبقرى رجل الأعمال نصر محروس واللى الف الفيلم ليس حبا فى سواد عيون الشاب تامر لكن اكيد الناس الفاهمة فى السينما عارفة هو الف واخرج ومش بعيد هيغنى كمان حبا فى عيون الأيرادات الجامدة اللى هيحققها مجرد ظهور الشاب تامر فى الفيلم ده وراجعو ايرادات الفيلم الفلتة التحفة النادرة عمر و سلمى


الألبون ده 14 اغنية ايوة يا سادة يا كرام 14 اغنية مرة واحدة لكن المستوى العام صفر الحمد لله ولا صفر مونديال 2010 الشهير اللى ادى مصر كلها على قفاها لا مؤاخذة نفر نفر عيل عيل وخلانا فرجة قدام العالم


الأستاذ تامر الف ولحن وغنى كمان حقه امال ايه ؟ مش ملك الجيل يا جدعان ؟؟ يبقى يعمل اللى هو عاوزه طالما وراه ترسانة اعلامية وجيل تافه بيسانده وآدى الغلاف بتاع الألبون



شوفتو ملحن كام اغنية ؟؟ شوفتو مالف كام اغنية ؟؟ وطبعا مغنى كل الأغانى براحته بأة ملك الجيل بأة ... استك منه فيه بأة


اى واحد بيسمع ومتابع مزيكا يعرف ان المطرب لما يغنى من تأليف نفسه والحان نفسه بيبقى فى نغمة التكرار والتشابه فى اغانيه وبيجرب مرة وخلاص لو نجح وعنده جديد الناس بيعجبها الوضع وبتقول الله يا استاذ وطبعا عندنا امثلة كتيرة على رأسها موسيقار الأجيال (مش موسيقار ولا ملك الجيل ) الأستاذ محمد عبد الوهاب الله يرحمه لكن اللى حاصل هنا ان الشاب تامر ملوش دعوة بالكلام ده نازل تأليف وتلحين وغنا كأن مفيش حد بيألف ولا يلحن فى البلد حاجة تفقع مش كدة ؟ لو بيقول جديد ومش بيكرر نفسه اوكى لكن لما نقعد نسمع تلاقى كله شبه بعضه زى العيش البايت كدة ابو نص جنيه بيبقى عامل زى ابو ربع جنيه كله واحد


المشكلة بأة ان الشاب تامر لما تسمع الأغانى بتاعة الألبوم التحفة ده تحس انك سمعت الألحان دى قبل كدة !!! على سبيل المثال اغنية -متوصينيش- الأغنية دى جملها اللحنية كلها متاخدة من اغنية اجنبية بتتسمع فى كل الديجيهات اللى فيكى يا مصر !!


اغنية كمان اسمها -افتكرلى- تقريبا نسخة طبق الأصل من اغنية تامر ذات نفسه اللى اسمها -ارجعلى- فى الألبوم اللى فات


اغنية - بعيد عن عينى - وبالرغم من انها من كويسة نوعا ما الا انها متشابهة فى اغنية رامى صبرى -حبيبى الأولانى- من ناحيةالأسلوب والجو العام للأغنية مش فاهم هو تامر كان بايت برة لما رامى عمل الأغنية دى ولا ايه ؟


الأغنية المتخلفة اللى اسمها - هى دى - اللى هى اساس دعاية الفيلم التحفة اول مطلع فيها نفس مطلع اغنية شيرين - مش بتاعة الكلام ده - مع تعديل بسيط جدا فى التوزيع !!


اغنية كمان اسمها - ايام زمان- تعتبر افضل اغنية فى اللبوم من ناحية اللحن والكلمات لكن للأسف هى تقريبا نفس لحن وفكرة اغنية الفنان مدحت صالح - يانا- اللى غناها من حوالى شهرين فى احد الأفلام المعروضة فى السينما


اما الأغانى العبقرية بأة اللى كلها الفاظ عجيبة وغريبة لم ترد على صناع الأغانى قط فهى كتيرة الحمد لله من اول اغنية - هى دى - اللى وردت فيها جملة كوميدية للغاية بتقول ( حبك يتاخد قفش) وكانى داخل خناقة مع البنت اللى بحبها وهدب صوابعى فيها اخرج قلبها واقولها حبك يتاخد قفش بالذمة ده كلام ؟


واغنية كمان اسمها - روح قلبى - فيها حتة عجيبة برضه تامر بالغ فيها اوى لما قال طب خللى الدنيا تضايقك يوم شوف انا هعمل ايه ف الدنيا ... يا سلام ؟؟؟ طب كنت اتشطر على نفسك الأول وادى الخدمة العسكرية لما انت جامد اوى كدة وتستحمل اى حاجة ولا ايه ؟؟؟؟


انا طولت عليكو بس الموضوع زاد عن حده اوى ... روابط المعجبين بتوع الشاب تامر فى المنتديات والمواقع المختلفة الطابع الأغلب انهم مش راضيين عن الألبوم التعبان ده لكن بيكابرو برضه على اساس انه تامر يا جدعان ملك الجيل التافه او بنطلونات واقعة للركب


الله يرحمك يا حليم

22 comments:

Eno said...

ههههههههههههههههههههههههههه
ههههههههههههههههههههه
ههههههههههههههههه
هههههههههههههه
ههههههههه
يالهوووووووووووي ده انت منفسن من تامر اووووووووووووي
هو بصراحه الالبوم الجديد
تؤتؤ الالبون الجديد تحفه لا حصل ولا هيحصل انا سمعت انه مرشح لجايزة الدوله التقديريه

علي كمية البستفه اللي بيبستف بيها حبيبته وطبعا هابل البنات من كتر حمشنته مع حبيبته

ومنشف ريق البنات من كتر ما بي .... عليه ده تامر مش اي حد ياجدعان
وانا من مكاني ده بناشد اي حد مسئول عن الموضوع ده وبقولها
ارررررررررحمووووووووووووووووونا بأأأه
اوووووووووووووف
تحياتي ياكاشف الستائر والخبايا عن الشاب تامرر
هوووووووووو ده :))

Foxology said...

eno

ههههههههههههههههههههههههههههههههههه

تعليقك فطسنى من الضحك وربنا

خصوصا اووووف اللى فى الآخر دى البلوج ولع من السخونية بتاعتها :))

والله حاجة تفقع ونفسى اشوف اى حد مسؤل عن الالبوم ده علشان اقوله اوووووف :))

نورتى الكيت كات :)

tarek momen said...

انت قلت لي اسمه تامر ايه؟؟؟؟
ياربي هو الأسم ده مايجيش من ناحيته حاجة عدلة

Foxology said...

tarek momen

ههههههههههههههههههههههههههههههههههه

ايه يا استاذ طارق ماله الأسم هو احنا نقدر نتكلم ؟؟ :))

نورتنى :)

واحدة مفروسة said...

فوكس انا جيت امضى حضور بس
لكن مش قريت...لأنك كاتب عن تامر حسني
وانا مش بحبه اصلا...بحس انه فوفو كده حاجه مش لطيفه
يعني بعد ما تتكلم عن منير يافوكس تتكلم عن تامر
يالله انا جيت و بس

Foxology said...

واحدة مفروسة

نعمل ايه ؟؟ مفروسين ولازم نطلع فرستنا من تيمور وامثاله وعموما ليكى حق متقريش انا اساسا كنت قرفان وانا بكتب البوست لكن كنت مخنوق ومفروس ومش قادر مكتبش عن القرف ده

نورتى الكيت كات :)

enjy said...

يا رااااااااااااااجل مزعلاك يتاخد قفش ومش لفتت نظرك الاغنية الهابطة اللى انا مش عارفة اسمها لانى اكيد ماسمعتهاش غير مرة واحد اللى بيقولها فيها اكتر حاجة بتحبيها مااقدرش اقولها فى اغنية العيب فيكى العيب مش فية؟؟؟؟؟؟؟؟؟؟؟
بغض النظر عن اى ايحاءات تيجى فى بالك هو اساسا كان بيقول الجملتين مش بيغنيهم يعنى حاشرهم فى قلب الاغنية حشر لمجرد انه يقول كدة وخلاص........ البوستر التحفة واخد وضعين واحد واقف رافع راسه وبيتغرغر والتانى موطى راسه وبيرجع وفى البوسترين فاتح التيشرت على اخره كان السوستة بايظة................ انا اسفة لو كنت قلت حاجة مش لائقة بس معلش اللى عايزه اقوله اكتر من كدة بكتيييييييييييييييييييييييييييير

Foxology said...

enjy

لالالا قولى اللى ف نفسك انا عامل الموضوع ده مخصوص علشان كل واحد يقول اللى ف نفسه ناحية الشاب الفلتة ده

انا معاكى انه مصر تماما ان ف كل اغنية لازم جملة كدة ملهاش معنى او ليها معنى سافل المهم انها تتحط وخلاص

شكرا للمرور والتعليق :)

فرنسا والرايق said...

يالهوييييييي
تامر حسني
ده ملزق و مسهوك
انا مش بحبه خااالص

Foxology said...

فرنسا والرايق

ههههههههههههههههههههههههههههههههه
ملزق ومسهوك ؟؟؟ شتايم كوميدية اوى بس لايقة عليه الحقيقة :)

نورتو المدونة :)

نوره الخشن ــ آي و كفاية said...

صحابي امنية حياتهم يخدوني الفيلم معاهم قولتلهم مدفعش فلوس في فيلم للمتخلف الهابط ده
قالولي نعزمك قولتلهم لأ برضو مقدرش استحمل غلاسته
فضلت اساومهم لحد ماوصل بيهم الامر
وقالولي نعزمك وتاخدي 20 جينية ونأكلك في كنتاكي بعد السينيما
وانا فضلت متمسكة برأيي الديكتاتوري ودخلوا هما كلهم معايا عمر حرب

واترنيت حتة علقة بعد الفيلم بسبب انه طلع سافل

بس برضو انا عندي فيلم له قصة ومعنى وان كانت غريبة علينا كشرقيين وممكن يكون فيه مناظر مش ظريفة
عن فيلم لواحد اهبل ابن هبله واللي مألفه متخلف وبطله عنده نسبة عبط لو وزعناها على العالم جايز تفيض ونصر كمان

لورنس العرب said...

البني آدم ده أصلا- أعوذ بالله من الشيطان الرجيم
حاجه فعلا تقرف الكلب - فما بالك بالبني آدمين

كاتب مصري said...

والله عندك حق ياعم تعرف تامر ده مش بيزلي من زور كنت بحب أسمعو بس خلاص بأه حاجة ...يلا بلاش نغلط ع الناس
وخليه ياخد جابزة الدولة يعني من امتى كانت جوايز الدولة مكافئة لليستحقوها أساسا
كبر
تحيتي

Foxology said...

نورة الخشن

اى حد بيقوللى عن الفيلم ده ببصله بقرف حتى لو كان بيقولى تعالى ندخله بهزار الواحد مننا معندوش غير مرارة واحدة :))

معلش علقة تفوت ولا حد يموت انا قريت النقض وسمعت القصة هى قصة غريبة عننا فعلا كشرقيين لكن السفالة اللى فى الفيلم مش حاجة غريبة على المخرج العجيب خالد يوسف

شكرا للمرور والتعليق :)

Foxology said...

لورنس العرب

على رأيك ياباشمهندس والله بجد حاجة تقرف
يلا هنعمل ايه ربنا مقردلنا اننا نتعامل ونشوف ونسمع عينات من البشر زى الأخ

نورتنى :)

Foxology said...

كاتب مصرى

انا زمان اول لما طلع كنت بسمعه وقلت هيبقى حاجة لكن للأسف الهبل والأستعباط والتفاهة هما اللى بيأكلو عيش فى الزمن ده

نورت الكيت كات :)

aliaawwe said...

هو بصراحه البوم وحش اوى بس اغنيه هى دى كويسه الى حدا ما بس بصراحه عجبتنى الترياه اللى انت كتبها عليه اوى
i am new in blogging world
this my blog
http://aliaawwe.blogspot.com
waiting for your comments
thanks

على باب الله said...

هو سعادتك الألبوم موجه إلي البنات المراهقات فقط .. زي الفيلم كده .. أنا حسيت من إعلانه أن الفيلم موجه نحو هرمونات المراهقة للبنات مش أكتر و بأعبط و أزبل طريقة في الدنيا

----

Foxology said...

aliaawwe

والله هو اللبوم كله على بعضه مش كويس وان كان فى اغنية او اتنين فيهم الرمق شوية بس زى ما قلت انه مكرر نفسه بطريقة عجيبة زى ما يكون مصر انه يكون مكرر

شكرا للمرور والتعليق :)

Foxology said...

على باب الله

بالظبط هو ده اللى كنت عاوز اقوله بس احتراما للجنس الناعم اللى بيزور المدونة حفظت رأيى لنفسى

شكرا للمرور والتعليق ونورت الكيت كات :)

صيدلانيه طالعه نازله said...

للاسف بحب صوته و جبت الالبون بس لسه مش سمعته
اما الفيلم هوا نفس سهوكه عمر و سلمى مع فرق زينه من مى
تامر مش بيطور من نفسه هو بيطور وسيله حرق دمنا احنا
انا رحت الفيلم و خفت اكتب عنه لاحسن انضرب من رابطه معجبى ملك الجله مش الجيل

Foxology said...

صيدلانية طالعة نازلة

صوته كويس مفيش حاجة اللهم لا اعتراض لكن فعلا الألبون والفيلم اخر هرتلة وقلة ذوق واحساس فنى وكل حاجة

لو كنتى كتبتى محدش كان هيتكلم مظنش ان الجيل ابو بنطلونات واقعة للركب ليه ف موضوع البلوجات كبيره اوى يدخل غرف شات الياهو او يبعت اس ام اس على ميلودى ومزيكا ويقول انا شبه تامر :))

نورتى الكيت كات :)