لو بطلنا نحلم

منير قالها زمان .. لو بطلنا نحلم .. نموووت

من السهل ان الواحد يحقق أى حلم هو بيحلمه مهما كان حجمه .. سهل التحقيق طالما الواحد مؤمن بالحلم ده ومصمم انه يحققه

المتعة الحقيقية فى اننا نحقق حلمنا ونعيش كل تفاصيل الحلم لحظة بلحظة ومنديش الوقت أى فرصة انه يعدى من غير ما نستمتع بيه جوة الحلم بتاعنا

يمكن يكون كلامى غريب شوية
ومن غير مناسبة .. لكن ده احساسى من امبارح الصبح على فكرة



وهدية منى ليكم الصورة دى اللى لقطتها بنفسى امبارح بليل فى المترو واللى بتعبر عن عادة أصيلة فى الشعب المصرى وهى متابعة ما يجرى باهتمام بالغ خصوصا على صفحات جرائد الغير .. الشرطى ادى مثال للكلام ده وعبر بلسان حاله ان الشعب فى خدمة الشرطة فى كل حاجة حتى فى توفير الجرايد والمجلات ببلاش وكنت متوقع الراجل اللى معاه المجلة انه يرد على الشرطى : ابقى هات معاك كتابك لو سمحت .. مهرجان القراءة للجميع 2009


28 comments:

Eno said...

كلامك جميل اوي يافوكس المتعه الحقيقه اننا حلمنا سوا وحققنا حلمنا سوا
يارب كل الاحلام اللي بنحلم بيها تتحقق :)

بالنسوسبه بأه للراجل اللي بيشارك في القرايه انا كنت خايفه عليك وانت بتصور :)))))
بس ربنا سترها

تحياتي علي البوست اللي اوله كلام يتحس قبل مايتقري

Foxology said...

Eno

ربنا يتقبل منك دعائك :)

اااااااه بصراحة كان موقف مينفعش يفوت من غير تصوير :)))

شكرا لمرورك وتعليقك الجميل :)

Israa El-sakka said...

كلامك حلو أوي يا فوكس لكن في حد يصور أمين شرطة ...دول يعني بيبقوا متنشنين كده :) لا ربنا يسترها عليك شكلك مستبيع
سلاااام

Unknown said...

لو بطلنا نحلم هيحصل حاجة من اتنين

اما نموت فعلا

او نبقى واقعيين

مش عارفة بس انا خنيقة اليومين دول...الشرطة فى خدمة الشعب اه..معروفة دى

The illusionist said...

مساء الخير عليك استاذ فوكس
ايه الكلام الحلو ده
فعلا الواحد طول ما هو قاعد بيحلم
الجنه والنجاح والافكار والمشاريع
والا كنا خلاص مبقاش فى طعم للحياه اصلا
والصوره طالعه زى الفل بس المفروض اللى اعرفه العكس
الشرطى بيخش
ياخد المجله يفرها متين مره
وبعدين يحطها ويقول سلامو عليكوم

حاسوباتيه said...

بالنسبه لاحلام فانا مقاطعاها من زمان وهي كمان قاطعتني باختصار مافيش عمار بينا

بالنسبه للصوره فعلا بتحصل كتير ههههههه يلا كله ببلاش حتى القرايه احنا الي بندفع تمنها والحكومه ببلاش

Foxology said...

Israa El-sakka

شكرا على تعليقك :)

اه وليه لأ ؟ مش مواطن عادى راكب مترو ؟؟ :))

شكرا لمرورك وتعليقك :)

Foxology said...

enjy

الواقعية اعتقد انها افضل من الموت :)

عادى وقت وهيعدى ان شاء الله

شكرا لمرورك وتعليقك:)

Foxology said...

THE illusionist

مساء النور يا ساحرنا :)

اكيد طبعا الحياة مش هيبقى ليها طعم لو مفيش اى حلم نحلمه

مهو الشرطى هنا لو عمل كدة كان هيترد عليه : ابقى هات معاك كتابك لو سمحت .. مهرجان القراءة للجميع :))

نورت الكيت كات

Foxology said...

حاسوباتية

ليه بس كدة ؟

ربنا يصلح الأحوال

شكرا لمرورك وتعليقك

Unknown said...

المتعه الاجمل فى السعى لتحقيق الاحلم والوصول له
شئ جميل
بجد بوست جميل
تحياتى لك

على باب الله said...

الواقع هو السؤال : ليه ؟

الحلم هو السؤال : ليه لأ ؟

و بما أن الإنسان مخلوق فضولي جداً .. فلازم يحلم و يغامر

---

الدليل على إن الإنسان كائن فضولي هو أمين الشرطة اللي في الصورة
:)
-

شمس النهار said...

مشاعركم تجاه حلمكم وتجاه بعض جميله جدا
ربنا يكفيكم شر العين
ويتم لكم علي خير
امين
الصوره لطيفه جدا

الميكروباص said...

فيه احلام بتبقى صعبه
وبتاخد وقت كبير
واحنا بصراحه مستعجلين لأن الدنيا بتجري حوالينا
.....
الصوره تحفه ومعجزه بصراحه
اسمح لي انقلها للناس عبر الميل
لأن تقريبا معظم الناس بيحصل معاهم اللي في الصوره دي
يا راجل ده انا كنت ماسك كتاب كيمياء وواحد عمال يبص فيه- طيب يا سيدي انت لا بتعرف انجليزي ولا بتفهم في الكيمياء بتبص على ايه؟

Foxology said...

نهر الحب

اكيد طبعا متعة كبيرة كمان وتتويجها بتحقيق الحلم نفسه

شكرا لمرورك وتعليقك :)

Foxology said...

على باب الله

تعريفاتك للحلم والواقع ممتازة :)

وفعلا الأنسان فضولى بطبيعته وغلب القط :))

شكرا لمرورك وتعليقك :)

Foxology said...

شمس النهار

ربنا يخليكى يا شمس البلوجز وشكرا بجد على تعليقك ومرورك الكريم :)

Foxology said...

لورنس العرب

عندك حق يا باشمهندس وهو الأنسان بطبيعته عجول :)

انا ضحكت كتير على موضوع كتاب الكيميا ده والله احنا شعب تحفة :))

نورت الكيت كات :)

Nostor Azzuro said...

كل الشعب المصرى بيسمع كلام ماما سوزان

القراءة للجميع

Foxology said...

Nostor Azzuro

لازم نسمع كلام ماما طبعا :))

شكرا لمرورك وتعليقك :)

جلال كمال الجربانى said...

السلام عليكم

لولا الأحلام كنا طقينا من زمان
والسعى لتحقيق الحلم أهم من الحلم نفسه
وربنا يحقق أحلامنا قول يارب
--------
وإحتمال يكون أمين الشرطه
من مباحث القراءه فى المترو
زى مافيه مباحث النت
ويبقى صورته وهو بيأدى عمله يابطل
وده ممنوع .. وربنا يستر

ودمت أخى بخير

Foxology said...

واحد من العمال

عندك حق اكييييد

حلو موضوع مباحث القراءة ده :)))
ربنا يستر

تحياتى :)

ميرام said...

لو بطلنا نحلم نموت ..!
اممم
وأوقات برضو لما بنحلم بنموت ..
مين أثبت صحة النظرية دي ..
محدش
محدش مستعد انه يعيش بدون حلم ..
عشان الحلم بيدي نور لاي حد عايش في ضلمة
اوقات بيوصل للنور ده ..
واوقات بيكون نور وهمي ...
وده بقى الي بيموت ...
ايه لازمة الكلام الي بقوله ده
مش عارفه (:
تعليقا على الصورة
(: لو بطلنا فضول ... نموت

تحيــــــاتي

Foxology said...

ميرام

تحليل منطقى على فكرة :)

شكرا لمرورك وتعليقك :)

لاسع افندى said...

لو بطلنا نحلم نموت
لو عاندنا نقدر نفوت
حلمك املك..بدراعك وعملك



تحياتى

Foxology said...

لا سع أفندى

بالظبط كدة :)

شكرا لمرورك وتعليقك أول مرة بالكيت كات

Empress appy said...

عاده التطفل الفزيه اللى الناس مش عاوزه تبطلها

Foxology said...

Appy

عادة فرعونية اصيلة :))

شكرا لمرورك وتعليقك