دخلنا عصر التعبيرية


طبعا موضوع فبركة الأهرام لصورة قادة مفاوضات السلام بواشنطن الفترة اللى فاتت كانت حديث وكالات الأنباء العالمية وكانت فضيحة بجلاجل كمان خصوصا ان السيد المحترم أسامة سرايا فسر الفبركة بأنها " تعبيرية " والحقيقة انا بقوله بلاش مداراة يا استاذ سرايا كلنا عارفين انها متفبركة ومعمولة بالأمارة ببنرنامج مشهور جداااا اسمه " الفوتوشوب " واللى عمل الفبركة للأسف مش ذكى وكشف نفسه بنفسه بعد ما غير فى اهم معالم الصورة الأصلية

بما اننا دخلنا عصر " التعبيرية " اسمحولى اقدم لكم اخر انتاج تعبيرى واحد عمله على جروب ف الفيس بوك بيتهكم فيه وبيسخر من مدرسة الأهرام " للصور التعبيرية " والصور كالآتى


الصورة الأصلية - نهاية اجتماعات القمة العربية فى مدينة سرت الليبية الأسبوع الماضى




الصورة التعبيرية - لو طبعا الأهرام عملتها - كانت هتكون كدة

مهو من وجهة نظر الأهرام مينفعش حد يحط ايده على كتف الريس - يادى العيبة - مينفعش خالص يا جماعة

لما حصل موضوع فبركة الصورة مكنتش مندهش مهو بعد ما الدكتور مصطفى محمود الله يرحمه بطل يكتب فى الأهرام ومكنش بمزاجه زى ما اتوقف العلم والايمان برضه مش بمزاجه وبعد ما نجم الجير تمورة بأة من كتاب الأهرام محدش يستغرب يا جماعة

16 comments:

The Queen said...

بقى في " عك " في كل حاجه في بلدنا
والمهم انك تسمع مبررات لكل واي حاجة مهما كانت مستحيلة ومجنونة
ومطلوب انك تصدق غصب عنك
بس الصورة حلوة
تحياتي لك

Foxology said...

The Queen

المشكلة ان اللى بيعك عارف اننا عارفين انه بيعك ومع ذلك سايق الهبل ع الشيطنة وعامل نفسه صادق والمفروض على كلامك اننا نصدق غصب عننا حتى لو كان الكلام مش منطقى ولا عاقل

شكرا لمرورك وتعليقك

صوت من مصر said...

من اهم مواصفات الشاب السيس انه يبقى ايه
متأمر وتعبيرى

Foxology said...

صوت من مصر

اضيف من عندى انه بيكون سفيه وبيدارى الفضيحة بفضيحة اكبر

نورت الكيت كات يا كيمو

Mafrousa said...

ايه يا فوكس؟؟؟
زعلان ليه؟؟؟؟؟
ما الناس كووووووووووووولها سايقة الهبل على الشيطنة
اتفرج و اتفرس زيي و انت ساكت
ده بقا شعب يفرس و بلد تفرس و حكومة تفرس و كل حاجة تفرس

عاوز تنشكح
روح اتفرج على الناس اللى بينقذوهم فى تشيلي
و الله حاجة تفرح بجد
و سيبك مننا
احنا خلااااااااااااااص

اقصوصه said...

looooooooooool

شرالبليه ما يضحك :)

الازهرى said...

ولسه ياما فى الجراب يا حاوى

للأسف الشديد أصبح يحيا الرئيس وعاش الزعيم هوس مفرط للغاية

تحياتى دوما

الميكروباص said...

اسامه سرايا انا شفته في قناه او تي في لما المشكله دي حصلت وقال انه بيعتذر وان الصوره تعبيريه عن ان مبارك هو قائد المفاوضات
لكن المشكله ان اسامه سرايا عمل حاجه هو بس اللي فاهمها
يعني الدنيا كلها فهمت حاجه- وهو كان قاصد حاجه تانيه

وله في ذلك حكم!!!

Foxology said...

Mafrousa

الواحد بأة بيتفرس كانه بيتنفس بالظبط ولو محصلش كدة يحس ان فى حاجة غلط !!

تشيلى الوضع فيها عجيب والبنى آدم له تمن وغالى كمان مش زينا الصخرة وقعت ع الناس قاموا مسويين الصخور بالأرض والناس تحتها !!!

عادى بأة بأة حاجة تفقع وتفرس وتحرق الدم كمان

شكرا لمرورك وتعليقك

Foxology said...

اقصوصة

شر البلية يضحك فعلا ولكنه ضحك كالبكاء

شكرا لمرورك و تعليقك

Foxology said...

لورنس العرب

بصراحة الراجل ده انا بعتبره منافق جداا خصوصا مسح الجوخ اللى باين اوى فى مقالاته اللى مظنش ان حد بيقراها غيره برضه !!

شكرا لمرورك وتعليقك

Foxology said...

الازهرى

والله يا ازهرى مش عارف هو مرض ولا نفاق ولا خوف ولا ايه بالظبط

ما علينا

شكرا لمرورك وتعليقك

tarek momen said...

يا ليلة سوخة بقي نجم الجير تمورة بيكتب في الأهرام طب الحمد لله اني مقاطع الجرايد من حوالي خمس سنين طيب طمني مين بيكتب مكان عبد الوهاب مطاوع.. ياتري سعد الصغير واللا شعبولا

Eno said...

ههههههههههههههههههههههههههههه
الصور فطسطني من الضحك حلوة مش ينفع حد يحط ايده علي كتف الريس

فكرتني بعادل امام في المسرحية وهو بيقول وهو الريس لسه هياكل البطيخ بالبذر الرئيس ياكول علي طوووووووووووول

ههههههههههههههههههههههههههه
تحياتي ياسي فوكس:)

Foxology said...

Eno

ايوة طبعا ولا زعيم الا الزعيم !!!

نورتى الكيت كات

Foxology said...

tarek momen

اه والله يا استاذ طارق وتخيل ان المقالة كانت عبارة عن خليط عجيب من العربية الفصحة والعاميية الشعبية ومليانة اخطاء املائية فادحة وفاضحة للأهرام .. للأسف الأهرام فقد عظمته بعد ما بقى الجريدة الحكومية الأولى بلا منازع

شكرا لمرورك وتعليقك